ಮಾನಸಿಕ ಒತ್ತಡದಿಂದ ಹೊರ ಬರುವುದು ಹೇಗೆ # How to come out of Mental Stress

ಒತ್ತಡವು ಕಠಿಣ ಪರಿಸ್ಥಿತಿಯಿಂದ ನಮ್ಮ ಮನಸ್ಸಿನ ಮೇಲಾಗುವ ಚಿಂತೆ ಅಥವಾ ಮಾನಸಿಕ ಉದ್ವೇಗದ ಸ್ಥಿತಿಯಾಗಿದೆ. ಒತ್ತಡವು ಎಲ್ಲರಿಗೂ ಕೆಲವೊಮ್ಮೆ ಸಾಮಾನ್ಯವಾಗಿ ಉಂಟಾಗುವ ಮಾನವ ಪ್ರತಿಕ್ರಿಯೆಯಾಗಿದೆ. ನಿಮಗೆ ಗೊತ್ತೇ, ಮಾನವ ದೇಹವು ಒತ್ತಡವನ್ನು ನಿಭಾಯಿಸಲು ಮತ್ತು ಅದಕ್ಕೆ ಪ್ರತಿಕ್ರಿಯಿಸಲು ಬೇಕಾದ ಸಾಮರ್ಥ್ಯವನ್ನು ಹೊಂದಿರುತ್ತದೆ. ಆದರೆ ಕೆಲವು ಅನಿರೀಕ್ಷಿತ ಬದಲಾವಣೆಗಳು ಅಥವಾ ಹೆಚ್ಚಿನ ಸವಾಲುಗಳನ್ನು ಎದುರಿಸುವಾಗ ದೇಹವು ದೈಹಿಕ ಮತ್ತು ಮಾನಸಿಕವಾಗಿ ಪ್ರತಿಕೂಲ ಪ್ರತಿಕ್ರಿಯೆಗಳನ್ನು ಕೊಡಲು ಶುರುಮಾಡುತ್ತದೆ. ಇದೇ ಒತ್ತಡ (Stress ).

ಒತ್ತಡದ ಲಕ್ಷಣಗಳು# Symptoms of Stress

ಒತ್ತಡದ ಸಮಯದಲ್ಲಿ ಹೃದಯ ಬಡಿತ ಹೆಚ್ಚಾಗುತ್ತದೆ, ಉಸಿರಾಟವು ವೇಗಗೊಳ್ಳುತ್ತದೆ, ಸ್ನಾಯುಗಳು ಬಿಗಿಯಾಗುತ್ತವೆ ಮತ್ತು ರಕ್ತದೊತ್ತಡ ಹೆಚ್ಚಾಗುತ್ತದೆ.

ದೀರ್ಘಾವಧಿಯ ಒತ್ತಡದಿಂದ ದೇಹದ ಮೇಲಾಗುವ ದುಷ್ಪರಿಣಾಮಗಳು

ಒತ್ತಡವು ಜೀವನದ ಒಂದು ಭಾಗವಾಗಿದೆ. ನೀವು ಅದನ್ನು ಹೇಗೆ ನಿಭಾಯಿಸುತ್ತೀರಿ ಎಂಬುದು ಮುಖ್ಯವಾದುದು. ಮಿತಿಮೀರಿದ ಒತ್ತಡ ಮತ್ತು ಅದರೊಂದಿಗೆ ಬರುವ ಆರೋಗ್ಯದ ಪರಿಣಾಮಗಳನ್ನು ತಡೆಗಟ್ಟಲು ನೀವು ಮಾಡಬಹುದಾದ ಅತ್ಯುತ್ತಮ ಕೆಲಸವೆಂದರೆ ನಿಮ್ಮ ಒತ್ತಡದ ಲಕ್ಷಣಗಳನ್ನು ತಿಳಿದುಕೊಳ್ಳುವುದು . ಆಗೊಮ್ಮೆ ಈಗೊಮ್ಮೆ ಆಗುವ ಸ್ವಲ್ಪ ಒತ್ತಡದ ಬಗ್ಗೆ ಚಿಂತಿಸಬೇಕಾಗಿಲ್ಲ. ಆದರೆ ದೀರ್ಘಕಾಲದ ಒತ್ತಡವು ಅನೇಕ ಗಂಭೀರ ಆರೋಗ್ಯ ಸಮಸ್ಯೆಗಳನ್ನು ಉಂಟುಮಾಡಬಹುದು ಅವುಗಳೆಂದರೆ:

ಖಿನ್ನತೆ, ಆತಂಕ ಮತ್ತು ಮಾನಸಿಕ ಆರೋಗ್ಯ ಸಮಸ್ಯೆಗಳು.
ಅಧಿಕ ರಕ್ತದೊತ್ತಡ, ಅಸಹಜ ಹೃದಯದ ಬಡಿತ, ಹೃದಯಾಘಾತ ಮತ್ತು ಪಾರ್ಶ್ವವಾಯು ಸೇರಿದಂತೆ ಹೃದಯ ರಕ್ತನಾಳದ ಕಾಯಿಲೆಗಳು
ಅತಿಯಾಗಿ ಅಥವಾ ಅತಿಕಡಿಮೆ ತಿನ್ನುವುದು ( Emotional eating), ಬೊಜ್ಜು
ಮುಟ್ಟಿನ ಸಮಸ್ಯೆಗಳು
ಪುರುಷರಲ್ಲಿ ಮತ್ತು ಮಹಿಳೆಯರಲ್ಲಿ ಲೈಂಗಿಕ ಆಸಕ್ತಿ ಕಡಿಮೆಯಾಗುವುದು
ಚರ್ಮ ಮತ್ತು ಕೂದಲಿನ ಸಮಸ್ಯೆಗಳಾದ ಕೂದಲು ಉದುರುವಿಕೆ, ಮೊಡವೆ, ಸೋರಿಯಾಸಿಸ್ ಮತ್ತು ಎಸ್ಜಿಮಾ ಮುಂತಾದವು

ಒತ್ತಡದಿಂದ ಹೊರಬರುವುದು ಹೇಗೆ ? # 9 Tips to go Stress free

1. ಧೀರ್ಘ ಉಸಿರಾಟದ ವ್ಯಾಯಾಮಗಳು(ಪ್ರಾಣಾಯಾಮ)

ಉಸಿರಾಟದ ತೊಂದರೆಗಳು ಒತ್ತಡ ಮತ್ತು ಆತಂಕದ ಸಾಮಾನ್ಯ ಲಕ್ಷಣವಾಗಿದೆ. ಉಸಿರಾಡುವಿಕೆಯ ಈ ತೊಂದರೆಗಳು ನಿಮ್ಮ ಹೃದಯ ಬಡಿತವನ್ನು ಹೆಚ್ಚಿಸುತ್ತದೆ, ನಿಮಗೆ ತಲೆಸುತ್ತುವಂತೆ ಮಾಡುತ್ತದೆ ಮತ್ತು ಪ್ಯಾನಿಕ್ ಅಟ್ಯಾಕ್ ಅಪಾಯವನ್ನು ಸಹ ಹೆಚ್ಚಿಸಬಹುದು. ಆದ್ದರಿಂದ ನೀವು ಅನುಲೋಮ ವಿಲೋಮ ಮುಂತಾದ ಉಸಿರಾಟದ ವ್ಯಾಯಮವನ್ನು ಪ್ರತಿದಿನ ಅಭ್ಯಾಸ ಮಾಡುವುದು ಒಳ್ಳೆಯದು.

2. ಸಿಗರೇಟ್ ಮತ್ತು ಮದ್ಯವನ್ನು ತ್ಯಜಿಸಿ

ಆಲ್ಕೋಹಾಲ್ ಮತ್ತು ಸಿಗರೇಟುಗಳು ವ್ಯಸನಿಗಳಿಗೆ ಮೊದಲಿಗೆ ನರಗಳನ್ನು ಶಾಂತಗೊಳಿಸುವಂತೆ ಅನಿಸಬಹುದು, ಆದರೆ ಇದು ಸ್ವಲ್ಪ ಸಮಯದ ವರೆಗೆ ಮಾತ್ರ. ಧೂಮಪಾನವು ಒತ್ತಡ ಮತ್ತು ಆತಂಕದ ಲಕ್ಷಣಗಳನ್ನು ಇನ್ನಷ್ಟು ಹದಗೆಡಿಸುತ್ತದೆ ಎಂದು ಹಲವಾರು ಅಧ್ಯಯನಗಳು ತೋರಿಸುತ್ತವೆ. ಆದ್ದರಿಂದ, ಆತಂಕದ ಭಾವನೆಗಳನ್ನು ಕಡಿಮೆ ಮಾಡಲು ಮದ್ಯಪಾನ ಅಥವಾ ಧೂಮಪಾನವನ್ನು ತಪ್ಪಿಸಲು ಪ್ರಯತ್ನಿಸುವುದು ಒಳ್ಳೆಯದು.

3. ಪ್ರವಾಸಗಳನ್ನು ಕೈಗೊಳ್ಳಿ

ನಾವಿರುವ ಪರಿಸರ ಬದಲಾದರೆ ನಮ್ಮ ಆಲೋಚನೆಗಳು ಮತ್ತು ಮನಸ್ಸಿನ ಒತ್ತಡ ಕಡಿಮೆಯಾಗುತ್ತವೆ. ಹೀಗಾಗಿ ಒತ್ತಡದ ಜೀವನದಲ್ಲಿ ಒಂದಷ್ಟು ದಿನಗಳನ್ನು ಮಕ್ಕಳೊಂದಿಗಿನ ಪ್ರವಾಸಕ್ಕಾಗಿ ಮೀಸಲಿರಿಸಿ. ಪ್ರವಾಸ ಕೈಗೊಳ್ಳುವುದರಿಂದ ಮನಸ್ಸಿಗೆ ನೆಮ್ಮದಿ ಎನಿಸುತ್ತದೆ. ಹೊಸ ಜಾಗದ ಆಚಾರ ವಿಚಾರಗಳು ನಮ್ಮನ್ನು ಹಳೆಯ ಕಹಿ ನೆನಪುಗಳಿಂದ ಹೊರ ಬರಲು ಸಹಾಯ ಮಾಡುತ್ತದೆ. ಹೀಗಾಗಿ ಆಗಾಗ ಪ್ರವಾಸ ಕೈಗೊಳ್ಳುವುದು ನಮ್ಮ ಮಾನಸಿಕ ಆರೋಗ್ಯವನ್ನು ಕಾಪಾಡುತ್ತದೆ.

4. ಧ್ಯಾನ ಮತ್ತು ಮಂತ್ರ ಪಠಣೆ

ದ್ಯಾನವು ಸಾವಧಾನತೆ ಮತ್ತು ಸಮಾಧಾನದ ಮನಸ್ಥಿತಿಯನ್ನು ರೂಢಿಗೊಳಿಸುತ್ತದೆ. ಯೋಚನಾಮಗ್ನ ಮನಸ್ಸನ್ನು ತಿಳಿಗೊಳಿಸುತ್ತದೆ. ನಿಮ್ಮ ಮನಸ್ಸಿನಿಂದ ನಕಾರಾತ್ಮಕ ಆಲೋಚನೆಗಳನ್ನು ತೆಗೆದುಹಾಕಲು ನಿಮಗೆ ಸಹಾಯ ಮಾಡುತ್ತದೆ. ಹಾಗೆಯೇ ನಿತ್ಯವೂ ಮಂತ್ರ ಪಠಿಸುವುದರಿಂದ ಒತ್ತಡ ಕಡಿಮೆಯಾಗಿ ಸಕಾರಾತ್ಮಕ ಶಕ್ತಿ ನಮ್ಮಲ್ಲಿ ಹೆಚ್ಚುತ್ತದೆ.

5. ನಗು

ಆತಂಕ ಮತ್ತು ಒತ್ತಡವನ್ನು ನಿವಾರಿಸುವಲ್ಲಿ ನಗು ನಿಜವಾಗಿಯೂ ಅತ್ಯುತ್ತಮ ಔಷಧವಾಗಿದೆ. ನಗು ದುಃಖದ ಭಾವನೆಗಳನ್ನು ನಿಲ್ಲಿಸುತ್ತದೆ. ಇದು ನಿಮ್ಮ ದೃಷ್ಟಿಕೋನವನ್ನು ಬದಲಾಯಿಸಲು ಸಹಾಯ ಮಾಡುವುದಲ್ಲದೆ ಸನ್ನಿವೇಶಗಳನ್ನು ಹೆಚ್ಚು ವಾಸ್ತವಿಕವಾಗಿ ನೋಡಲು ನಿಮಗೆ ಅನುವು ಮಾಡಿಕೊಡುತ್ತದೆ. ದೇಹದ ನೈಸರ್ಗಿಕ ಭಾವನೆಗಳಿಗೆ ಉತ್ತಮ ರಾಸಾಯನಿಕಗಳಾಗಿರುವ ಎಂಡಾರ್ಫಿನ್ ಬಿಡುಗಡೆಯನ್ನು ಪ್ರಚೋದಿಸುತ್ತದೆ. ಜೀವನಕ್ಕೆ ಸಂತೋಷ ಮತ್ತು ಉತ್ಸಾಹವನ್ನು ಸೇರಿಸುವುದಲ್ಲದೆ ಆತಂಕ, ಉದ್ವೇಗ, ಮತ್ತು ಒತ್ತಡವನ್ನು ನಿವಾರಿಸುತ್ತದೆ ಮತ್ತು ಮನಸ್ಥಿತಿಯನ್ನು ಸುಧಾರಿಸುತ್ತದೆ.

6. ಪ್ರಕೃತಿಯೊಂದಿಗೆ ಹೆಚ್ಚು ಸಮಯ ಕಳೆಯಿರಿ

ಪ್ರಕೃತಿಯಲ್ಲಿ ಸಮಯ ಕಳೆಯುವುದು ದೇಹ ಮತ್ತು ಮನಸ್ಸಿಗೆ ಒಳ್ಳೆಯದು. ಇದು ಆತಂಕ ಮತ್ತು ಒತ್ತಡದ ಭಾವನೆಗಳನ್ನು ನಿವಾರಿಸಲು ಸಹಾಯ ಮಾಡುತ್ತದೆ. ನೈಸರ್ಗಿಕ ಸೌಂದರ್ಯವು ಕೋಪ, ಭಯ ಮತ್ತು ಒತ್ತಡವನ್ನು ಕಡಿಮೆ ಮಾಡುತ್ತದೆ ಮತ್ತು ಆಹ್ಲಾದಕರ ಭಾವನೆಗಳನ್ನು ಹೆಚ್ಚಿಸುತ್ತದೆ ಎಂದು ಅಧ್ಯಯನಗಳು ತೋರಿಸುತ್ತವೆ.

ಪ್ರಕೃತಿಗೆ ಒಡ್ಡಿಕೊಳ್ಳುವುದರಿಂದ ಮಾನಸಿಕ ಮತ್ತು ದೈಹಿಕ ಆರೋಗ್ಯ ಸುಧಾರಿಸುತ್ತದೆ. ರಕ್ತದೊತ್ತಡ, ಹೃದಯ ಬಡಿತ, ಸ್ನಾಯುವಿನ ಒತ್ತಡ ಮತ್ತು ಒತ್ತಡದ ಹಾರ್ಮೋನುಗಳ ಉತ್ಪಾದನೆಯನ್ನು ಕಡಿಮೆಯಾಗುತ್ತದೆ.

7. ಹಿತವಾದ ಸಂಗೀತವನ್ನು ಆಲಿಸಿ

ಸಂಗೀತದ ಶಕ್ತಿಯು ನಮ್ಮ ಭಾವನೆಗಳ ಮೇಲೆ ಪರಿಣಾಮ ಬೀರುತ್ತದೆ ಮತ್ತು ಅತ್ಯಂತ ಪರಿಣಾಮಕಾರಿ ಒತ್ತಡ ನಿರ್ವಹಣಾ ಸಾಧನವಾಗಿದೆ. ಹಿತವಾದ ಸಂಗೀತವು ನಾಡಿಮಿಡಿತ ಮತ್ತು ಹೃದಯ ಬಡಿತವನ್ನು ನಿಧಾನಗೊಳಿಸುತ್ತದೆ, ರಕ್ತದೊತ್ತಡವನ್ನು ನಿಯಂತ್ರಣದಲ್ಲಿಡುವುದಲ್ಲದೆ ಒತ್ತಡದ ಹಾರ್ಮೋನುಗಳ ಮಟ್ಟವನ್ನು ಕಡಿಮೆ ಮಾಡುತ್ತದೆ ಮತ್ತು ನಮ್ಮ ಚಿಂತೆಗಳಿಂದ ನಮ್ಮನ್ನು ದೂರವಿಡುತ್ತದೆ.

ನಮ್ಮ ದಿನಚರಿಯಲ್ಲಿ ಸಂಗೀತವನ್ನು ಸೇರಿಸುವುದು ಒಂದು ಸಣ್ಣ ಪ್ರಯತ್ನವಾಗಿದ್ದು ಉತ್ತಮ ಪ್ರತಿಫಲವನ್ನು ನೀಡುತ್ತದೆ. ಏಕೆಂದರೆ ಒತ್ತಡ ಕಡಿಮೆಯಾದಾಗ ನಮ್ಮ ದಿನಚರಿಯಲ್ಲಿ ಮಾಡುವ ಕೆಲಸಗಳ ಕಡೆ ಗಮನ ಹೆಚ್ಚಾಗುತ್ತದೆ. ಮಲಗುವ ಮುನ್ನ ಟಿವಿ ಅಥವಾ ಫೋನ್‌ ಸ್ಕ್ರೀನ್ ನೋಡುವ ಬದಲು ಸಂಗೀತವನ್ನು ಕೇಳುವುದು ಉತ್ತಮ.

8. ಹಾಡುಗಳನ್ನು ಹಾಡುವುದರಿಂದಲೂ ಒತ್ತಡವನ್ನು ನಿಯಂತ್ರಿಸಬಹುದು

ಗಾಯನವು ಒತ್ತಡವನ್ನು ಕಡಿಮೆ ಮಾಡುತ್ತದೆ, ಆತಂಕವನ್ನು ನಿವಾರಿಸುತ್ತದೆ ಮತ್ತು ಎಂಡಾರ್ಫಿನ್‌ಗಳನ್ನು ಹೆಚ್ಚಿಸುತ್ತದೆ ಎಂದು ವೈಜ್ಞಾನಿಕವಾಗಿ ಸಾಬೀತಾಗಿದೆ, ಇದು ನಿಮಗೆ ಸಂತೋಷವನ್ನು ನೀಡುತ್ತದೆ. ಇದು ಸ್ನಾಯುವಿನ ಒತ್ತಡವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ ಮತ್ತು ರಕ್ತದ ಹರಿವಿನಲ್ಲಿ ಒತ್ತಡದ ಹಾರ್ಮೋನುಗಳ ಮಟ್ಟವನ್ನು ಕಡಿಮೆ ಮಾಡುತ್ತದೆ ಮತ್ತು ನಿಮ್ಮ ಮನಸ್ಸನ್ನು ಶಾಂತವಾಗಿರಿಸಲು ಸಹಾಯ ಮಾಡುತ್ತದೆ.

ಇದರ ಜೊತೆಗೆ, ವಿಜ್ಞಾನಿಗಳು ಕಿವಿಯಲ್ಲಿ ಸ್ಯಾಕ್ಯುಲಸ್ ಎಂಬ ಸಣ್ಣ ಅಂಗವನ್ನು ಗುರುತಿಸಿದ್ದಾರೆ, ಇದು ಹಾಡುವ ಮೂಲಕ ರಚಿಸಲಾದ ಆವರ್ತನಗಳಿಗೆ ಪ್ರತಿಕ್ರಿಯಿಸುತ್ತದೆ. ನೀವು ಹಾಡುವ ಸಕಾರಾತ್ಮಕ ಹವ್ಯಾಸಗಳನ್ನು ರೂಢಿಸಿಕೊಳ್ಳಲು ಅದ್ಭುತ ಧ್ವನಿಯನ್ನು ಹೊಂದಿರಬೇಕಾಗಿಲ್ಲ. ನಿಮ್ಮ ಧ್ವನಿ ಹೇಗೇ ಇರಲಿ ಅದು ಮುಖ್ಯವಲ್ಲ ನಿಮ್ಮ ಮನಃಶಾಂತಿ ಸಂತೋಷ ಮುಖ್ಯ.ಆದ್ದರಿಂದ ಬಿಡುವಿನಲ್ಲಿ, ಮನೆಕೆಲಸದ ಸಮಯದಲ್ಲಿ ಹಾಡು ಗುನುಗುತ್ತಾ ಸಂತೋಷದಿಂದ ಇರಿ.

9. ಒತ್ತಡವನ್ನು ಕಡಿಮೆ ಮಾಡುವ ನಿಟ್ಟಿನಲ್ಲಿ ವ್ಯಾಯಮದ ಪ್ರಯೋಜನಗಳು

ನಿಯಮಿತ ವ್ಯಾಯಾಮವು ಒತ್ತಡದ ಹಾರ್ಮೋನುಗಳ ಮಟ್ಟವನ್ನು ಕಡಿಮೆ ಮಾಡುತ್ತದೆ. ಇದು ಎಂಡಾರ್ಫಿನ್‌ಗಳನ್ನು ಬಿಡುಗಡೆ ಮಾಡಲು ಸಹಾಯ ಮಾಡುತ್ತದೆ, ಇವು ನಿಮ್ಮ ಮನಸ್ಥಿತಿಯನ್ನು ಸುಧಾರಿಸುವ ಮತ್ತು ನೈಸರ್ಗಿಕ ನೋವು ನಿವಾರಕಗಳಾಗಿ ಕಾರ್ಯನಿರ್ವಹಿಸುವ ರಾಸಾಯನಿಕಗಳಾಗಿವೆ.
ವ್ಯಾಯಾಮವು ನಿಮ್ಮ ನಿದ್ರೆಯ ಗುಣಮಟ್ಟವನ್ನು ಸುಧಾರಿಸುತ್ತದೆ ಹಾಗೂ ಒತ್ತಡ ಮತ್ತು ಆತಂಕವನ್ನು ಕಡಿಮೆ ಮಾಡುತ್ತದೆ
ನಿಯಮಿತವಾದ ವ್ಯಾಯಾಮವು ಹೆಚ್ಚಿನ ತೂಕವನ್ನು ಕಡಿಮೆ ಮಾಡಿ ಆತ್ಮವಿಶ್ವಾಸ ಮತ್ತು ಉತ್ತಮ ಭಾವನೆಗಳನ್ನು ಮೂಡಿಸುತ್ತದೆ, ಇದರಿಂದ ಒಟ್ಟಾರೆ ಯೋಗಕ್ಷೇಮ ಸುಧಾರಿಸುತ್ತದೆ.

ಮಾನಸಿಕ ಒತ್ತಡದಿಂದ ಹೊರ ಬರುವುದು ಹೇಗೆ # How to come out of Mental Stress